伯伯：
人老咗就係老咗，唔係你個年紀老左，係你個心，由你決定咗將自己封印喺某一個年代之後，你唔再向前行，時代點變，你都活喺70年代，咁點解仲要留戀今日嘅眼球呢？70年代嘅你，嚟到21世紀，企上台，仲奢望可以帶領潮流？你意識到，係幾咁唔有型嘅一幾事嗎？
跟唔上就係跟唔上㗎喇。不論你嘅視野、思想，甚至作品都反映到，唔係你已經比潮流嘅洪流淘汰，係你一早放棄咗潮流。我好明白，你哋嗰一代好簡單，所以你哋好留戀，賊咪就係奸囉，警察咪就係忠囉，做娛樂咪就係明星囉，搵到錢咪就係成功囉，好簡單㗎嘛，但係我哋呢一代唔係咁樣㗎。社會已經改變咗，職業生態改變咗，周圍所有嘢都改變咗，如果你嘅目光去到25歲，就已經選擇停滯不前，你點解會睇到今日社會嘅真面貌啫？你今日企出嚟，除咗不合時宜，大家就只會見到一堆已經下垂鬆脫嘅皮肉，承載着空白嘅年華，咁多年來，不理政治嘅你哋跟進過啲乜嘢？你有冇睇到而家呢一代係做緊啲乜嘢？如果你講嘅嘢咁正確，會唔會有一絲懷疑，點解年輕一代全部向你倒戈相向？定還是，全代人都係錯，只有你哋嗰一代係正確。
生不逢時，我哋呢一代冇機會見到你貢獻過嗰個社會，我哋只見到個社會仲貢獻緊嘅你，唔奢望你會識得欣賞後生嘅人鍾意嘅音樂、電影、作品，亦冇人迫過你要去理解，唔緊要，攬住你自己嗰個年代嘅觀眾、嗰個年代嘅朋友，講你哋年代嘅語言，去吸引返同一個年代嘅人，陶醉喺你地自己嘅幻想世界吖，繼續催眠自己，叮噹出嚟就管治到香港啦，係，或者係，但係都話俾你知就連你口中嘅叮噹都改咗名做多啦A夢十幾二十年喇，you are so done！
兩位的確係社會上嘅寄生蟲，拖慢社會前進，同時促進大腦退化，如果你哋仔女真係學你哋咁樣去分是非黑白嘅話，good luck，佢將會學識原來撐警就可以周街打人，免受法律責任，原來幾塊玻璃嘅價值比人命更高，原來做人唔識一樣野係一種驕傲，可以走出嚟大大聲話「我唔識政治。」唔識就去學，你出得嚟講嘢就唔可以話自己唔識，你唔識就唔好講！你地做人咁多年，經歷過咁多件事，仲係未學識承擔責任。
做人要有承擔，一人做事一人當，唔好以「做個仔嘅榜樣」為名，去發表你哋今日不負責任嘅言論，然後要自己嘅下一代無啦啦蒙上不白之冤。你可以出賣所有香港嘅下一代，但係將自己下一代未來嘅自由出賣，再擺佢哋上枱做藉口同台階，本住「為仔女」為踏腳石托自己上道德高地，無論點睇都極之卑鄙。
晚輩 檸
Search